Friday, February 29, 2008

Ég fer ekki fet!

“Þá er það ákveðið” eins og ræningjarnir í Kardemommubænum sögðu forðum daga. Við verðum áfram í Austurkoti. Það hafa fáir komið til að skoða kotið og enginn haft veruleagn áhuga, þar til að hingað kom stúlka í gær og hún var virkilega spennt fyrir að kaupa húsið, bað um að fá viðeigandi pappíra yfir eignina til að fara í greiðslumat hjá bankanum, við sögðumst koma með pappírana á fasteignasöluna á morgun (þa.e. í dag) Þá fóru að renna á mig tvær grímur, var ég virkilega tilbúin að afhenda ókunnugum þetta notalega hús? Það kemur ekki til greina að selja húsið án þess að hafa augastað á öðru húsi til að flytja í. Þrátt fyrir mikla leit hefur okkur ekki tekist að finna hús af þeirri stærð sem við viljum, hér byggja menn almennt stór hús og húsið á hæðinni sem kom þessu öllu af stað hefur ekki lækkað í verði og þá fer ég ekki fet. Palli hefur lítið haft sig frammi í þessu máli en ég hef fundið það á honum að hann er ekki eins spenntur fyrir að skipta eins og ég. En augu mín opnuðust í gær þegar það var komin alvara í spilið og ég sá að það var ekkert annað að gera en segja væntanlegum kaupanda og Patríciu fasteignasala að við værum hætt við að selja. Og satt að segja létti mér þegar ég var búin að ræða málið við Palla og segja honum að ég vildi hætta við. Ég fór að hugsa um að það væru raunverulega engin haldbær rök fyrir því að skipta um húsnæði og ég er búin að sjá það þessa daga sem við höfum verið að skoða hús, að Austurkot er bara sælureitur sem ég vil vera á. Við getum alveg ráðið hvað við ræktum mikið, alveg eftir því hvað við treystum okkur að gera.

Það er svo notalegt að sitja á veröndinni, mér finnst vorið vera að koma hitinn í dag fór í +22°. Hér vil ég vera.

Því munum við frekar eyða meiri peningum og tíma í ferðalög en áður, virkilega njóta lífsins á meðan við getum. Hér eru svo mörg tækifæri í boði varðandi ferðalög, hægt að fara svo auðveldlega til margra landa. Næsta á dagskrá er ferð til Madeira en þangað fljúgum við næsta mánudag og komum til baka á fimmtudaginn. Þið fáið örugglega að sjá einhverjar myndir þaðan, okkur er sagt að þarna sé mjög falleg náttúra.

Svanfríður Ameríkufari spurði í dag hvort við töluðum portúgölsku, öllu má nú nafn gefa. Við höfum reynt að komast inn í málið með því að spjalla við nágrannana sem tala ekkert annað tungumál. Við getum bjargað okkur í búðum og á matsölustöðum en það er varla hægt að segja að við getum haldið uppi vitrænum samræðum, þó skömm sé frá að segja. En það eru alltaf fleiri og fleiri sem tala ensku, sem eykur okkur letina við að læra portúgölsku.
Nú kveð ég að sinni og óska ykkur góðrar helgar, heyrumst í næstu viku.

Posted by Þórunn at 23:01:11 | Permalink | Comments (4)

Monday, February 25, 2008

Fleiri blóm og ferðalög

Þá erum við komin heim úr helgarferðinni til Lissabon og nágrennis. Mér finnst þetta hinn ágætasti ferðamáti að sitja í rútu, njóta útsýnisins og láta leiða mig á áhugaverða staði. Ég er líklega svo mikil ljóska að ég á erfitt með að horfa á umhverfið til að njóta þess á meðan ég keyri bíl. En hvað um það þá tókst þessi ferð vel, þrátt fyrir rigningu á laugardaginn. Við skoðuðum gamla höll í Sintra, þessari höll hefur verið haldið ágætlega við og það er mikið af húsgögnum í góðu standi þrátt fyrir háan aldur. Á laugardagskvöldið var farið með okkur í eitt stærsta spilavíti Portúgal sem nefnist Casino Estoril. Nú skil ég nafngiftina “spilavíti” eins og það er kallað á íslensku því mér fannst flestir gestirnir sem sátu við spilakassana/vélarnar vera daprir á svip og fullir kvíða og spennu. Þarna voru vélarnar mataðar stanslaust á peningum án þess að menn fengju nokkuð til baka. En við vorum þarna komin til að njóta skemmtunar sem fram fór í stórum sal sem var útbúinn eins og leikhús með ljósabúnaði og breytanlegu sviði. Sýningin átti að túlka öfl náttúrunnar, haf, himinn, eld, vatn og vind. Þetta var gert með tónlist, söng, dansi og fimleikum. Þarna blossuðu upp eldtungur svo að hitann lagði um allan sal, vatn féll úr loftinu niður á sviðið og fimleikafólk kom niður úr loftinu yfir salnum, hangandi í rólum og garði margskonar æfingar. Maður sat agndofa yfir þessu, sýningin tókst svo vel.
Á sunnudaginn vorum við að mestu í Lissabon, það var farið með okkur í skoðunar ferð í rútunni þar sem leiðsögumaður benti okkur á markverðar byggingar, skrúðgarða og minnismerki. Það er ekki nokkur leið fyrir ókunnuga að komast yfir að sjá þetta allt á einum degi svo ég var mjög ánægð með aksturinn um borgina. Að endingu var farið með okkur að svæðinu sem byggt var upp fyrir heimssýninguna 1998 (vona að ártalið sé rétt) þar er umferðamiðstöð fyrir rútur, járnbrautalestir og neðanjarðarlestir. Í tengslum við umferðamiðstöðina er stór verslunarmiðstöð, sædýrasafn ásamt fleiri söfnum. Við fengum tæpa tvo tíma til að skoða þetta en þar sem við skoðuðum þetta svæði fyrir nokkrum árum notuðum við tímann til að ganga um í góða veðrinu og virða fyrir okkur mannvirkin á svæðinu þar á meðal var hægt að ganga langleiðina að sporði brúarinnar sem kallast Vasco de Gama eftir þekktum portúgölskum sæfara, brúin er 11-12 kílómetrar að lengd og er það sérstök tilfinning að keyra yfir hana.
Það var auðvitað tekið mikið af myndum í ferðinni og er erfitt að velja einhverja mynd til að sýna ykkur, en ég set fleiri myndir inn á Picasa albumið mitt sem þið getið skoðað.



hér er þó mynd af marmarahestum, þeir spegluðust svo skemmtilega í tjörninni

og Magnolíunni sem blómstrar svo fallega í garðinum hjá okkur núna

Posted by Þórunn at 22:12:00 | Permalink | Comments (2)

Monday, February 18, 2008

Möndlutré í blóma

Við höfum talað um það lengi að fara á þær slóðir sem Möndlutré vaxa og blómstra á þessum árstíma. Nú létum við loksins verða af því í gær, drifum okkur af stað fyrir kl: 10 og héldum í austurátt, áleiðis til Viseo og þaðan áfram þar til við vorum komin í lítinn bæ sem heitir Celorico sem byggður er í brekkum niður af gömlum kastala. Við gengum aðeins um og fengum okkur svo hádegismat.  Spurðum svo til vegar, hvert væri best að fara til að sjá Möndlutrén, okkur var bent á að fara norður til Trancoso og Vila Nova de Foz Cóa. Eftir því sem norðar dróg sáum við fleiri og fleiri blómstrandi tré meðfram veginum. Það var farið að líða á daginn og himininn dökknaði óðum, það virtist ætla að fara að rigna. Hérna eru nokkrar myndir af þessum fallegu blómum en því miður get ég ekki látið ilminn fylgja með en blómin hafa mjög góðan ilm.

Palli mundar myndavélina

nærmynd af bleiku blómunum



sum trén bera hvít blóm

Posted by Þórunn at 17:07:13 | Permalink | Comments (5)

Wednesday, February 13, 2008

Fátt í fréttum

Það mætti halda að ég hefði mikið að gera í húsnæðismálum fyrst ég má ekki vera að því að skrifa hérna á síðuna. Ég var alltaf að bíða eftir að eitthvað stórkostlegt gerðist en sú varð ekki raunin. Það er nóg af húsnæði til sölu hér í kring, ekki vantar það en á meðan enginn kemur til að kaupa Austurkot getum við ekkert gert. Það hefur komið fólk að skoða en það segir að við setjum upp of hátt verð og það er eins með eiganda hússins á hæðinni, hann vill fá svo mikið fyrir sitt hús að okkur finnst það alveg út í hött. En svo kom upp nýr flötur á málinu fyrir síðust helgi þá fengum við í hendurnar teikningu af fallegu húsi, mátulega stóru fyrir okkur, það er verktaki sem byggir mikið hér í nágrenninu sem er í startholunum með að byggja þetta hús ef hann fær kaupanda að því og þessi verktaki kom til okkar á laugardaginn til að gera okkur tilboð, það kom til greina að hann tæki okkar eign uppí þetta hús sem átti að kosta 13,1/2 miljón. En hann sá ekkert nema lóðina hér, sagðist brjóta húsið niður og byggja parhús í trjágarðinum okkar og hann taldi lóðina ekki meira virði en 2,1/2 miljón. Við vorum fljót að afþakka þetta og kveðja manninn. Þetta varð til þess að við sláum öllu húsabraski á frest, gerum ekkert nema einhver komi og vilji “endilega” kaupa Austurkot fyrir gott verð og draumahúsið lækki verulega í verði, þá förum við af stað. Þið sjáið að þetta er orðið að óraunhæfum draumi hjá mér og mestar líkur eru á að við verðum áfram í Austurkoti enda líður okkur vel þar. Við erum að hugsa um að leggjast í ferðalög og taka svo lífinu með ró.

Þessi maður sem gengur þarna með kúna sína sem dregur vagn til að flytja eldinvið eða hey, hann er örugglega ekki með áhyggjur af því hvort hann eigi að skipta um hús eða bíl. Það verður æ fátíðara að maður sjái svona vinnudýr, en þó kemur það fyrir.

Posted by Þórunn at 20:24:42 | Permalink | Comments (5)

Tuesday, February 5, 2008

Meiri veisluhöld

Ég vil byrja á því að þakka ykkur öllum kæru vinir, sem hafið skilið eftir góðar kveðjur og skemmtilegar athugasemdir við síðustu færslur. Það virkar eins og vítamínsprauta að fá svona viðbrögð. Mér tókst að koma bæði tónlist og myndum inn á iPdinn svo að nú segist Palli þurfa að skoða eyrun á mér ef honum finnst ég heyra illa það sem hann segir, þessi tæki eru svo smá að það liggur við að menn þurfi stækkunargler til að sjá þau. En ég er viss um að ég á eftir að nota þetta talsvert.
Graca kom til okkar í gær til að bjóða okkur í hádegismat í dag, svo það eru áframhaldandi veislur hjá okkur. Ég set hérna inn mynd af blómstrandi Mímósu, sem ég tók á göngu okkar um skóginn um daginn. Mímósan er frekar sein í ár, oftast blómstrar hún seint í desember eða janúar.

Posted by Þórunn at 09:46:27 | Permalink | Comments (3)

Sunday, February 3, 2008

Annar í afmæli

Mikið átti ég góðan dag í gær, ég þakka innilega fyrir allar kveðjurnar á netinu og símtölin, þið eruð öll yndisleg.
Eins og ég sýndi ykkur í gær byrjaði dagurinn á því að minn elskulegi bóndi færði mér í rúmið, blómvönd og gjafir ásamt rjómatertu og epladjús (ekki alveg hollasti morgunverður en…..) já og svo stakk hann uppá að við færum í bæinn og keyptum ipod handa mér. Hafið þið heyrt um 72 ára gamlan mann sem býðst til að gefa konu sinni ipod í 65 ára afmælisgjöf???
Það er engin spurning að hann Palli er ungur í anda og uppátækjasamur. Við fórum til Aveiro og keyptum svona tæki, æ eitthvað svona tæki, úrvalið var svo mikið að ég varð alveg ringluð en fann eitt að lokum sem var líka með útvarpstæki, sem mér fannst kostur, og fórum heim með það. En þá kom í ljós að við vorum ekki nógu vel inni í því hvernig tækin vinna og þetta sem við keyptum vinnur ekki með imac tölvunni minni, við hentumst aftur í búðina og fengum tækinu skipt fyrir alvöru IPOD. Er það nokkur furða þó afi og amma viti ekki alveg hvað þau eru að gera þegar þau fara af stað til að kaupa ipod???
En rúsínan í pylsuendanum var kvöldstund sem við áttum með vinafólki okkar, við buðum þeim út að borða. Hér koma myndir frá kvöldverðinum, fyrst sjást Rui og Patricia (Patrícia er fasteignasali) þá Manuel og Matild ásamt vanganum á Gröcu og Artur,

svo sjást Joana, Artur og Graca

og að lokum sést afmælisbarnið fyrir enda borðsins, Palli var þarna líka en hann var í hlutverki ljósmyndarans. Semsagt frábær endir á frábærum degi.

Posted by Þórunn at 11:36:36 | Permalink | Comments (10)

Saturday, February 2, 2008

02022008

Í dag tölum við ekki um húsnæðismál, enda engar fréttir af þeim. Þessi dagur verður ekkert nema blóm, konfekt, ilmvatn og góður matur, þið fáið nánari fréttir af því seinna.

Posted by Þórunn at 08:59:22 | Permalink | Comments (7)