Monday, June 30, 2008

Athuganir

Ég hef gert lauslegar athuganir til að reyna að finna út ástæðu þess að sumir lesendur síðunnar sjá ekki allan textann sem ég skrifa. Helst hallast ég að því að það séu þeir sem nota Internet explorer sem verða fyrir þessu. Það væri fróðlegt ef þið prófuðuð að hlaða niður hjá ykkur Mozilla Firefox leitarvélinni, hana er auðvelt að finna á netinu og hún er ókeypis. Ég væri þakklát ef þið létuð mig svo vita hvernig gengur.
En snúum okkur að öðru, það er ánægjulegt að sjá þegar fólk tekur sig til og gerir endurbætur á húsum sínum eins og til dæmis Manuel og Matild hafa gert við sitt hús sem er þeim til sóma. Hús sem stendur skáhalt á móti okkur var selt síðasta vetur og hafa nýir eigendur lagt mikla vinnu í að breyta útliti húsins. En smekkur fólks er misjafn og ekki allir eins hrifnir af litavalinu, ég set hérna inn tvær myndir af húsinu önnur er tekin um miðjan dag en hin að kvöldi.

Það er bjart yfir þessu húsi

Og blár bjarmi á kvöldin

Posted by Þórunn at 21:45:56 | Permalink | Comments (7)

Friday, June 20, 2008

Já ég þori, get og vil……

Þessar fullyrðingar gæti hann Palli minn fengið að láni frá konunum sem sungu svona á kvennafrídaginn, fyrir mörgum árum síðan. Hann hefur þor og getu til að gera marga hluti sem gott væri að sjá vel til að gera, en þó hann sé mjög sjóndapur hefur hann ekki gleymt hvernig á að bora í vegg eða skrúfa skrúfu, hann notar bara fingurna til að þreyfa fyrir sér þegar aðrir nota augun til að sjá. Hann hefur lengi haft mikinn áhuga fyrir veðurspám og öllu sem varðar veðurfar, nú er hann búinn að eignast alvöru veðurstöð og til þess að hún vinni eins og hún á að gera þurfti að festa vindmælinn á háa stöng, sem hann setti á norðurgaflinn á húsinu, fékk sér stiga og prílaði upp með bor, stöng vindmælinn



hér er vindmælirinn kominn á sinn stað


Svo fór regnmælirinn upp á þakið yfir veröndinni

og hitamælirinn var hengdur í fötu á staur sem var stuðningur við vínviðinn hérna áður

þessir mælar eru allir með þráðlausum sendum sem senda allar upplýsingar í tölvuna, þar sem hægt er að sjá útkomuna eins og hún er hverju sinni. Svo geymast þessar upplýsingar í tölvunni svo það verður hægt að spyrja Palla í framtíðinni t.d. “hvernig var veðrið 17. júní 2008?” Þetta kerfi kemur sér mjög vel fyrir Palla þar sem hefur talgervil í tölvunni sem les upphátt allar upplýsingar sen hann vill vita. Svo nú þarf hann ekki lengur að lesa af venjulegum hitamælum með sterkum gleraugum að viðbættu stækkunargleri.

Ég skrifa þessa færslu með smærra letri en venjulega og vona að nú sjáist öll línan sem ég skrifa.
Ég hélt að ég væri að gera einhverjum greiða með því að hafa stafina stærri en nú hef ég fengið kvartanir og vona að þetta verði betra svona.

Posted by Þórunn at 21:14:35 | Permalink | Comments (5)

Thursday, June 19, 2008

Fótabúnaður

Mér datt þetta í hug um daginn þegar við Palli héldum það hátíðlegt að ég var búin að vera hér í átta ár. Þegar ég flutti hingað hélt ég því fram að ég gæti ekki gengið á flatbotna skóm, það urðu að vera hælar, ekki endilega svo háir, en hælar áttu það að vera. Svo leið tíminn og eftir því sem ég vann meira í garðinum og við vöndumst því að fara í göngutúra í gegnum skóginn þá var ekki um annað að ræða en nota viðeigandi fótabúnað og nú er svo komið að ég geng helst ekki á öðru heima en flip-flap eins og það er kallað

en ég sá einmitt grein í Mogganum nýlega þar sem varað er við þessum skóm og ég er alveg sammála, þeir geta verið hættulegir.
Þegar við förum í göngutúra og venjulegar búðarferðir fer ég helst ekki í annað en sandala

mér líður mjög vel í svona skóm og ég er viss um að þeir eru góðir fyrir fæturna.
En svo náði pjattið yfirhöndinni þegar við vorum í hátíðaskapi, ég varð að fara í eitthvað kvenlegra, ég legg ekki lengur á mig að vera í támjóum hælaskóm en dáist að konum sem geta notað þá, enda er úrvalið af þannig skóm alveg ótrúlegt. Ég lét mér nægja að fara í svona skó með svokölluðum Kínahælum

en Æ, Æ áður en ég vissi af var ég komin með blöðrur á nokkrar tær af því ég var sokkalaus og tærnar vanar að fá að anda án þess að nuddast innilokaðar í skóm.
Hvað ætli ein kona geti látið pjattið kvelja sig lengi?
Ætli ég fari bara ekki að vera púkó alla daga og láta mér líða vel í mínum sandölum.

Posted by Þórunn at 20:33:37 | Permalink | Comments (4)

Saturday, June 14, 2008

14. júní 2000

Þennan dag fyrir átta árum varð mikil breyting á lífi mínu, ég flutti til Portúgal.
Þessi ár hafa liðið ótrúlega hratt og ég segi bara að síðan þá hafi líf mitt verið dans á rósum. Mér hefur liðið svo vel hérna, var fljót að laga mig að nýjum lífsháttum og þetta varð fljótlega eins og ég hefði hvergi verið annarsstaðar. Við héldum daginn hátíðlegan með því að fara á veitingahús í Aveiro.

Posted by Þórunn at 22:46:16 | Permalink | Comments (5)

Monday, June 9, 2008

Þá er verkinu lokið

Loksins tókst mér að klára ætlunarverkið í dag. Það eru mörg handtökin við svona vinnu, enda telur Palli að verkið sé gert úr um 1000 flísabrotum. Fyrst er að gera uppkast af verkinu í huganum og á blað, ákveða liti, reikna út stærð og umfang myndanna, svo er að brjóta niður flísasýnishorn sem mér voru gefin í flísabúð í Albergaria. Svo þarf að slípa brúnirnar á hverju broti því það vill kvarnast upp úr þeim þegar ég klippi þau í sundur með sérstakri flísatöng (naglbít). Þá er komið að því að raða öllu á vegginn og líma liður hvern bút fyrir sig, láta það þorna og fylla svo í rifurnar, láta það þorna og þvo í burtu það sem er ofaukið af fúgufyllingunni. Þegar þetta er orðið þurrt set ég silikon vökva í fúgurnar svo þær þoli rigningu og þá er aðeins eftir að nudda silikonið burt sem lenti á flísunum.

Og svona lítur veggurinn út núna



Kisi fær að sitja áfram á veggnum upp við húsið, þó fyrirmyndin sé horfin,
við höfum ekki séð hann í mánuð.

Það er komin heimildarmynd sem Palli tók um þetta verk, á YouTube
smella bara á slóðina hér til hægri.


Posted by Þórunn at 22:37:12 | Permalink | Comments (8)

Sunday, June 8, 2008

Verklokin nálgast

Nú sé ég fyrir endann á verkinu sem ég hef unnið að undanfarið, ég sýni myndir eftir hvern áfanga. Hér hef ég lokið við að líma alla bútana á vegginn



það hefur viðrað vel til útivinnu undanfarið, svo vel að það þarf að hafa sólhlífar til að hlífa sér og veggnum fyrir sólinni. Ég er líka búin að fylla í fúurnar en á eftir að þvo og snyrta þetta. Ég spái því að verkið verði afhjúpað formlega á norgun.
Posted by Þórunn at 15:36:07 | Permalink | Comments (1) »

Wednesday, June 4, 2008

Aðeins að láta vita af mér

Það mætti halda að ég væri mjög upptekin, ég hef ekki látið heyra mikið frá mér undanfarið.
Ég er mest upptekin af því að leika mér, æfa mig að vinna videómyndir og setja út á netið og svo er það handavinnan, sem nú felst í að brjóta niður flísar og raða þeim svo saman aftur til að koma einhverri mynd á vegginn á veröndinni. Undirbúningsvinnu er að mestu lokið og í gær byrjaði ég að líma, ég set hér inn mynd af því sem ég er búin með, ég á eftir að fylla upp allt í kringum blómin. Svo fáið þið væntalega að sjá þegar verkinu verður lokið, vonandi um næstu helgi. En þetta verða nokkur hundruð bútar þegar allt er komið á vegginn sem er 4,1/2 meter á lengd og rúmir 50 cm á breidd.

Posted by Þórunn at 22:28:59 | Permalink | Comments (6)