Thursday, October 30, 2008

Vegir liggja til allra átta

Mér kom í hug þessi ljóðlína þegar ég sá þessar styttur í flugstöð Leifs Eiríkssonar. Þær horfa hver í sína áttina og eins gera ferðalangarnir sem eiga leið þar um. Svona má segja að líf okkar sé, eintómt ferðalag, við stefnum í ýmsar áttir en getum samt ekki verið viss um hvar við munum lenda.
Þegar við Palli ráðlögðum ferð okkar til Íslands, hugsuðum við helst um að hitta ættingja og vini til að eiga með þeim góðar stundir, ásamt því að Palli hitti lækninn sinn til að fá staðfestingu á því að lyfin sem hann fékk fyrir ári síðan hefðu unnið sitt verk, eins og kom líka á daginn.
Þetta gekk eftir en ekki áttum við von á þessum ósköpum sem dundu bæði yfir okkar þjóð sem aðrar, einmitt á þessum tæpa mánuði sem við stoppuðum á Íslandi. Við tókum þá ákvörðun að reyna að horfa bjartsýn til framtíðar, eins og allir eru hvattir til að gera þó útlitið sé frekar dökkt.
Við kvöddu okkar fólk og þökkuðum fyrir ánægjulegar stundir sem við áttum saman og héldum heim í Austurkot. En daginn eftir heimkomuna bárust þær alvarlegu fréttir að það hefði fundist heilaæxli í dóttur minni henni Sigrúnu. Svona fréttir eru auðvitað áfall fyrir hverja fjölskyldu, ég varð mjög slegin yfir þessu og hef verið eins og skugginn af sjálfri mér síðustu viku. En Sigrún er heppin að eiga góðan eiginmann og skilningsrík börn sem munu hjálpa henni og styðja eftir bestu getu. Eftir nákvæmar skoðanir fór Sigrún til fundar við heila og taugaskurðlækni sem sagði að þessi tegund af heilaæxlum kölluðust meningioma og væru góðkynja. Það var tekin ákvörðun um að fjarlægja þetta með aðgerð eftir ca. 3 vikur. Ég er rólegri eftir þessar fréttir, þó ég geri mér auðvitað grein fyrir að þetta er vandasöm aðgerð. Ég hef ekki hugsað mér að tala mikið um þessi veikindi en vildi þó segja frá þeim hérna, svo að vinir og ættingjar sem lesa þessa síðu, viti af þessu.
Ég bið ykkur að hafa dóttur mína í bænum ykkar, þið sem þekkið hana vitið hvar hún stendur í þeim málum. Hafið það gott, kæru vinir og verið góð hvert við annað.

Posted by Þórunn at 20:56:36 | Permalink | Comments (5)

Saturday, October 25, 2008

Komin heim í blíðuna

Við máttum ekki vera seinna á ferðinni til að komast úr landi. Þegar við vöknuðum á fimmtudaginn til að fara út á flugvöll, hafði snjóað og það var þó nokkuð slabb á veginum til Keflavíkur. En Haukur er góður bílstjóri og á traustum bíl svo hann kom okkur klakklaust til Keflavíkur. Við vorum kölluð út í vélina á réttum tíma en máttum svo sitja þar í klukkutíma á meðan snjór var hreinsaður af flugbrautinni og vélinni. Svo fréttum við að það hefði ekki verið hægt að lenda í keflavík um kvöldið vegna óveðurs. Við vorum komin heim til okkar kl. 22 um kvöldið og fengum góðar móttökur hjá Prins sem þvældist svo fyrir fótunum á okkur að við komumst varla inn í húsið. Það var notalegt að komast aftur heim og geta verið léttklæddur að vinna í garðinum, Palli hafði nóg að gera við að slá grasið en ég var meira í því að hreinsa visnuð blóm úr beðunum.
Við sendum góðar kveðjur til ykkar kæru vinir, það var svo notalegt að hitta ykkur og eiga góðar stundir saman, að ég tali nú ekki um allan góða matinn sem við fengum. Líði ykkur ætíð sem best.
Posted by Þórunn at 23:37:09 | Permalink | Comments (4)

Wednesday, October 22, 2008

Lokadagurinn

Þá er þessi ferð á enda, síðasti dagurinn á Íslandi (í þetta sinn) runninn upp. Við höfum verið heppin með veður, en þegar ég sit hér við skriftir, sé ég hvar falla stórar snjóflyksur fyrir utan gluggann, nákvæmlega eins og fólk vill hafa á jólunum. Þetta er mjög fallegt. Vonandi snjóar ekki svo mikið að við lokumst inni.
Haukur frændi Palla kemur svo að sækja okkur eldsnemma í fyrramálið, en hann er sem betur fer á góðum jeppa svo við þurfum ekki að kvíða því að komast ekki til Keflavíkur. Ef allt fer að óskum verðum við komin heim í Austurkot um kl. 22:00 annað kvöld. Ég læt svo heyra frá mér flótlega, innilegar þakkir til allra vina og vandamanna sem tóku svo vel á móti okkur og dekruðu við okkur á allan hátt.
Posted by Þórunn at 10:53:46 | Permalink | Comments (5)

Saturday, October 18, 2008

Sérstök upplifun

Það er búið að vera nóg að gera í heimsóknum hjá ættingjum og vinum sem allir taka á móti okkur með hlýju viðmóti og góðum mat. Ég ætla ekkert að telja upp alla sem við erum búin að hitta mér telst til að við séum búin að fara á 35 staði og eigum eftir að fara á amk. fimm í viðbót. Svo fórum við á útgáfutónleika Lay Low eða Lovísu ömmustelpunnar minnar. Það er mjög sérstök tilfinning að sjá og heyra afkomanda sinn, stíga fram á svið og flytja eigin tónlist ásamt fleiri góðum hljóðfæraleikurum. Auðvitað er ég ekki hlutlaus þegar ég segi að mér finnist hún hafa staðið sig vel, þrátt fyrir svolítið stress í byrjun mér fannst hún verða betri og betri með hverju lagi sem hún tók. Það var spennandi að heyra öll nýju lögin hennar en mér fannst líka gaman að heyra nokkur af gömlu lögunum hennar í nýrri útsetningu, það varð dúndur-stuð og hún fékk gott klapp.
Við, mamman og amman vorum auðvitað rígmontnar og þessi mynd var tekin af okkur eftir að tónleikunum lauk. Frá vinstri Sigrún dóttir mín, Lovísa og ég.

Posted by Þórunn at 11:00:02 | Permalink | Comments (3)

Friday, October 10, 2008

Allt í góðu hjá okkur

Ágætu vinir sem hafið litið hingað inn undanfarna daga, kærar þakkir fyrir góðar kveðjur. Við höfum haft það gott og nóg að gera. Palli fékk góðar fréttir hjá lækninum sínum, meinið er nánast horfið og ekkert annað að gera en halda áfram með lyfin og lifa og leika sér eins hægt er.
Mig langa að byrta hér mynd af mér, ásamt einstöku fólki sem hefur reynst okkur svo vel, að við fáum seint fullþakkað, talið frá vinstri
Sigga hanns Nonna sem ég tala oft um á blogginu mínu og svo eru það hjónin Guðjón og Hrefna sem af einstökum rausnarskap hafa lánað okkur heimili sitt og bíl til afnota, annað árið í röð. Innilega þakkir kæru vinir.

Það mætti halda að við hefðum komið með kreppu-púkann með okkur, eins og lætin hafa verið í þjóðfélaginu. Ég ætla að tala sem minnst um það en skil vel ráðamenn þjóðarinnar sem vilja sem minnst segja, eftir að það kemur í ljós hvað fólk er fljótt að mistúlka margt sem sagt er. Eina ráðið sem ég sé núna er að velta sér sem minnst upp úr þessu og horfa björtum augum fram á við. Auðvitað hafa margir tapað háum peningaupphæðum og margar sögur í gangi þar að lútandi, en það bætir ekki andrúmsloftið að tala endalaust um það.
Við horfum bara til næstu máltíðar sem við erum boðin í og hlökkum til að hitta fleiri vini og ættingja. Við stefnum að því að fara í Þorlákshöfn og Selfoss um helgina, þar eru líka ættingjar og vinir.
Njótum þess að eiga góðar stundir með okkar nánustu og gleðjast yfir því sem við eigum. Hafið það gott kæru vinir og verið góð hvert við annað.

Lífið er dásamlegt láti maður ekkert aftra sér frá að njóta þess.

Posted by Þórunn at 11:30:00 | Permalink | Comments (1) »