Lífið í Austurkoti

Þórunn — Thu, 30 Jul 2009 17:24:00 +0000

Ég varð hissa þegar ég fékk tölvupóst um að búið væri að flytja síðuna mína á nýjan stað og að ég hefði nóg pláss til að skrifa þar. En nú er ég farin að kunna svo ágætlega við nýju síðuna sem ég er að vinna í að ég held að ég haldi mig við hana, ég nenni ekki þessu hringli.

Verð hér eftir á http://austurkot.blogspot.com

eða þangað til þeir loka á mig þar. Bestu kveðjur

I have moved to http://austurkot.blogspot.com

Prins fósturpabbi

Þórunn — Sun, 05 Jul 2009 14:43:47 +0000

Þegar við komum heim frá Íslandi komumst við að því að Prins var búinn að taka að sér fósturbarn.
Lítill og horaður kettlingur elti hann hvert sem hann fór og gerir enn. Það er erfitt að hrekja í burtu svangar skepnur sem leita að mat hjá manni. Þess vegna höfum við látið það óátalið þó Prins bjóði honum að borða af diskinum hjá sér. Sá stutti er mjög var um sig og hleypur í burtu við minnsta þrusk eða hreyfingu. En það er gaman að sjá hvernig hann hermir allt eftir Prinsinum, eltir hann á röndum og reynir að gera eins og hann. Það er galsi í þeim stutta og hann gerir hvað hann getur til að fá Prins til að leika við sig, stundum gengur það svo langt að Prins verður pirraður og bítur í hnakkadrambið á þeim stutta sem vælir þá og hleypur í burtu en er óðara kominn aftur og gerir sér dælt við Prins.

Ég ætla að sýna ykkur nokkrar myndir af þeim félögum.

Hann var ergilegur að komast ekki inn fyrir flugnanetið

Hver getur staðist þetta augnaráð?

Nóg að gera í garðyrkjunni

Þórunn — Wed, 01 Jul 2009 21:47:55 +0000

Það hefur verið nóg að gera hjá okkur í garðinum síðan við komum til baka. Alveg er það með ólíkindum hvað gróðurinn getur vaxið á tveimur vikum. Bæði laukur og kartöflugrös voru horfin í arfa og komið kafgras í garðinum. Palli er búinn að slá tvisvar síðan við komum svo er hann búinn að skipta um slöngu í brunninum en það komu göt á hana á meðan við vorum í burtu, sem betur fer tók Manuel eftir því og slökkti á dælunni sem annars hefði gengið allan tímann. Ég hef verið að hreinsa til í blómabeðum og tók mig svo til í dag og tók upp allar kartöflurnar sem er um 10 kíló og er ég mjög ánægð með uppskeruna það sem við settum engar kartöflur niður þetta árið.
En uppskeran var svo léleg í fyrra að við létum hana liggja og svo gaf hún þetta af sér núna. Þetta er hægt þar sem kemur ekki frost í jörðu. Laukurinn virðist vera stór og góður, ég set inn sýnishorn af honum og nokkrum plómum sem eru orðnar þroskaðar. Sólgleraugun eru með til að sýna stærðina á laukunum.

Komin heim, ferðin gekk vel

Þórunn — Fri, 26 Jun 2009 22:11:59 +0000

Þá erum við búin að vera einn dag í húsinu okkar og mikið er það nú gott, þó við höfum haft það mjög gott á Íslandi er alveg yndislegt að vera komin heim. Manuel og Matild sóttu okkur á völlinn og við vorum komin heim kl: 23 í gærkvöldi eftir 18 tíma ferðalag. Við fengum góðar móttökur bæði hjá nágrönnum okkar og einnig hjá Prins, ég veit ekki hvort hann fann á sér að við værum að koma en hann sat úti á götu eins og hann væri að bíða.
En dvölin á íslandi var hin ánægjulegasta, það var ekki amalegt að fá afnot af húsi og bíl á meðan á dvölinni stóð, það voru vinir okkar Sigga og Nonni sem voru svona rausnarleg.

Hér sést Sigga á pallinum hjá sér

og svo er það húsið þeirra séð frá götunni

Við hittum marga ættingja og vini, aldursmunurinn var mikill sá yngsti var sex vikna en sá elsti 98 ára. Það var auðvitað mikil gleði að sjá son sinn aftur hann er hér á mynd með föður-ömmu sinni sem varð 98 ára gömul viku eftir að myndin var tekin

og svo er ég hér með börnin mín tvö Sigrúnu og Gunnar

að lokum er svo mynd af yngsta fjölskyldumeðlimnum honum Ísak, ég er afasystir hanns,
það eru amma, afi og pabbinn sem dáðst að drengnum sem brosir og hjalar aðeins sex vikna gamall

Ég læt þetta duga í kvöld, það eiga eftir að koma fleiri myndir úr ferðinni.

Ísland

Þórunn — Sat, 13 Jun 2009 12:59:12 +0000

Þá er fjörið byrjað hjá okkur á Íslandi. Við erum búin að hitta son minn sem var bara yndislegt. Svo förum við í heimsóknir í Birkihlíð og Naustabryggju í dag. Svo verður fjölskyldu-samkoma á Laugalæk á morgun, það verður örugglega gaman. Við höfum aðsetur hjá vinum okkar Siggu og Nonna í Garðabæ, ekki nóg með að hafa húsaskjól heldur lána þau okkur líka bíl, það er ekki amalegt að eiga svona vini.
Við munum halda austur fyrir fjall á sunnudagskvöld eða mánudagsmorgun.
Ef einhver hefur áhuga á að ná í okkur í síma, er númerið 6941614.

Síðasta færsla frá Portúgal, í bili

Þórunn — Wed, 10 Jun 2009 18:01:33 +0000

Þá erum við búin að setja niður í litlu ferðatöskurnar sem við höfum með okkur í þetta sinn og vonum svo að við sofum eitthvað í nótt en við þurfum að vakna klukkan rúmlega fimm til að leggja af stað út á völl. Manuel bauðst til að keyra okkur, við lendum svo í Keflavík klukkan rúmlega 22.
Ég reyni að koma hérna inn símanúmeri sem við munum hafa á meðan á dvölinni stendur en venjulega kaupum við okkur símakort í íslensku flugvélinni.

Mig langar til að sýna ykkur myndir af ekta flöskubursta tré. Ég man ekki eftir að hafa séð þetta fyrr, en náttúran er alveg undursamleg. Það sem meira er að þessir flöskuburstar virðast hafa eitthvað sem dregur býflugur alveg inn á milli stráanna. Hafið það gott kæru vinir við sjáumst vonandi sem flest.

Þetta tré er á aðaltorginu í Albergaria A Velha

Þórunn — Sun, 07 Jun 2009 20:32:34 +0000

Í tilefni sjómannadagsins set ég hér inn mynd af blómavasa sem ég keypti í einni ferðinni um daginn, mér finnst svo sniðugt hvernig hægt er að láta hvert eitt bóm njóta sín

Svo ætla ég að sýna ykkur hvað Prins er farinn að færa sig upp á skaftið við Palla, hann vill hjálpa honum við allt sem hann gerir, það var eitthvað bras með að tengja heyrnartól við tölvuna

Það er best að leggjast bara á gólfið til að komast betur að þessu

Nú er þetta komið í samband og best að prófa heyrnartólin

Dagur í austurlenskum garði

Þórunn — Wed, 03 Jun 2009 16:03:05 +0000

Þá er kominn tími til að setja inn myndir frá seinni degi ferðalagsins um daginn. Morguninn fer í það að hlust á sölumann kynna vörur sem fyrirtækið sem skipuleggur ferðirnar, hefur til sölu. Það er í lagi að hlusta á það því þar eru eingöngu á ferð mjög færir sölumenn, ekki uppáþrengjandi en einstaklega samfærandi. Þrátt fyrir það tekst þeim ekki að selja okkur neitt en það eru alltaf einhverjir sem kaupa.
Eftir hádegismat og útskráningu af hótelinu var keyrt að smábæ sem heitir Bombaral en skammt frá honum er stór jörð þar sem stunduð er vín og grænmetisrækt, en jörðin er svo stór að eigandanum datt í hug að gaman væri að hafa nokkrar styttur þar sér og öðrum til augnayndis. Eigandinn er einn af þeim sem veit ekki hvað hann á að gera við peningana sína svo hann fékk þá hugmynd að senda nokkurhundruð tonn af marmara og granit til Kína og fá þarlenda til að höggva úr því styttur af Budda og öðrum austurlenskum guðum. Þetta er svo sett niður á víð og dreif um jörðina og gestum og gangandi boðið að fara þar um og skoða. Þar sem ég sé vanari að sjá styttur af Maríu mey og öðrum dýrðlingum hér í Portúgal þá fannst mér þetta ekki vera í réttu umhverfi en samt sem áður fróðlegt að sjá. Og nú hefst sýningin, þetta byrjaði vel, hliðið yfir innganginum er veglegt

yfir vaatnið sét í afsteypu tugum kínverskra hermanna sem fundust í gröf einhvers konungs

Ég læt myndirnar tala fyrir sig, en mér fannst þetta dálítið undarleg samsetning og hvergi var neitt að sjá sem sagði hvað hvert listaverk táknaði.

Nótt í Lissabon

Þórunn — Sun, 31 May 2009 22:05:26 +0000

Við fórum í eina af okkar stuttu ferðum á föstudaginn og laugardaginn, fórum í þetta sinn með rútu ásamt tæplega fjörutíu manns hér úr nærsveitunum. Við þekktum engann í hópnum en könnumst við að hafa séð nokkra. Aðaltilganur ferðarinnar var að fara í leikhús í Lissabon og skoða austurlenskan garð sem er nýbúið að opna á vínbúgarði í Bombaral. Við gistum eina nótt í Caldas de Rainha en þar höfum við komið áður og meira að segja gist á sama hóteli. En þessi bær er þekktur fyrir sérstaka leirmunagerð og set ég hér inn myndir af munum sem skreyta veggi matsalarins á hótelinu.

Meira að segja vorum þarna flísar með Prinsinum

Og á barnum héngu drykkjusvín

Það má kalla þessa mynd "Nótt í Lissabon" hún er tekin kl 21, við eina aðalgötuna í Lissabon, þegar við vorum að fara í leikhúsið sem er þarna bakatil.

Hér er mynd af innganginum í leikhúsið, þar var flutt revía samin um ástandið í þjóðfélaginu í dag, það eru fleiri Spaugstofur enn á Íslandi þar sem gert er grín að þekktum persónum og ýmsu sem gerist og ekkert skilið undan. Mér fannst fróðlegt að sjá þessa sýningu þó ég skilji bara hrafl í tungumálinu þá náði ég innihaldinu vegna frábærs leiks og látbragðs.

Revíunni lauk ekki fyrr en eftir miðnætti og þá áttum við eftir að keyra klukkutíma leið á hótelið.
Ég ætla að setja inn aðra færslu um það sem við sáum seinni daginn, það er mikið myndefni og vonandi verð ég dugleg og set það inn fljótlega.
En svo fer að styttast í að við skreppum til Íslands, ætlum að vera þar í tvær vikur frá 11. - 25. júni. Gunnar sonur minn er að koma frá Malasíu, ég hef ekki séð hann í 10 ár svo það er tími til kominn að hitta hann.

Gott ávaxtaár

Þórunn — Mon, 25 May 2009 19:56:02 +0000

Það er búsældarlegt í ávaxtagarðinum núna, öll trén eru þakin af ávöxtum og ég er hrædd um að ef ég grisja þetta ekki þá gætu margar greinar brotnað undan þunganum þegar ávextirnir eru fullþroskaðir. Blöðin á lauknum eru líka mjög falleg og þar eru stórir laukar undir.

Svo er útlit fyrir gott rifsberjaár, runnarnir eru þaktir berjum sem eru byrjuð að roðna, en til þess að fuglarnir borðuðu ekki frá mér berin setti ég fuglafælur á snúrur yfir runnunum.
Það eru grænar ræmur úr plastpokum og geisladiskar sem glampar á í sólinni.

Þetta verða epli

perur

og dökk fjólubláar safaríkar plómur.